112. سعادتك في الامتلاك المادي ولا اكتساب الخبرات؟(إعادة)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة هي إعادة للحلقة (4) اللي بنتكلم فيها عن الفرق ما بين الإمتلاك المادي وإكتساب خبرات وأيهما بيحققلك السعادة.. الإمتلاك المادي بمعنى السلع أو الحاجات اللي ممكن تشتريها بالفلوس واكتساب الخبرات عن طريق السفر أو كورس تعليمي أو هوايات زي الرسم أو المزيكا وهكذا
(01:25) سهولة المقارنة بين السلع بيفسر قد إيه هما مش مرضين بالنسبالك -
(02:19) الضغط المجتمعي بيسبب تعاسه كبيرة جداً للناس -
(03:02) قيمة السلعة هي مدى إستفادتك أنت منها -
(05:47) تأثير الصرف على التجارب بيقعد مدى طويل جداً عن الحاجه المادية -
(08:53) بحث: مردود التجارب على الناس كسعادة أعلى بكتير جداً من الأستحواذ المادي -
(10:58) التجارب بتساعدك تكّون صداقات جديدة مع الناس -
(11:30) معظم الإمتلاك المادي بيجي من إحساسك انك هتفقد خصم معين في المحل الفولاني -
ياريت تشاركونا تجاربكم وآرائكم هل انت لو معاك فلوس تفضل تصرفها على خبرات ولا تصرفها على إمتلاك مادي؟
.اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
في حلقة النهاردة هنتكلم عن الفرق ما بين الإمتلاك المادي والخبرات.. الإمتلاك المادي هنا معناه السلع أو الحاجات اللي ممكن تشتريها بالفلوس والخبرات بمعنى حاجات بتكتسب منها خبرة زي السفر ، كورس بتتعلمه ، هواية زي الرسم أو المزيكا أيا كانت الهواية.. أقصد إن الخبرات ممكن تكون بطرق مختلفة كتير
(01:25)
طيب تعالوا نتكلم على الإستحواذات المادية أو الإمتلاك المادي أول خاصية في الإملاتك المادي إنهم سهل يتقارنوا بمعنى إن الأيفون 10 قدامه 11 قدامه 12 أنا حددتلك حاجه معينة في مخك بمتلكها مادياً فالناس بسهولة جداً تقدر تقارن وإن الحاجات دي تقدر تقارنها بيفسر كتير جداً إنهم مش مرضين بالنسبالك لأن بعد ما تشتري آيفون 10 هتبقى عاوز تشتري 11 ، 12 ، 13... زي مانت عايز بقى ، نفس الكلام على أي حاجه مادية أنت ممكن تشتريها ديماً هينزل منها حاجه جديدة ، عندك تليفزيون بعد شوية هيبقى قديم محتاج تشتري واحد جديد وهكذا
(02:19)
لما الحاجه تبقى سهلة في المقارنة ده بيخلقلك مشكلة تانية إنك بتشوف كل اللي حواليك عملوا ايه ، بيخلقلك مشكلة ضغط المجموعة أو الضغط المجتمعي فأنا ديماً بحاول أقارن نفسي وحبي للحاجه اللي اشتريتها دي هل هي أحسن حاجه مش بس بالنسبة للتكنولوجيا لأ ده بالنسبة لجاري عنده تليفزيون أحسن مني أو تليفونه أفضل مني.. وده بيساعد على عدم قناعتك بإن ده محققلك السعادة يبقى تاني حاجه هنا إن في حاجه اسمها الضغط المجتمعي وده بيسبب تعاسه كبيرة جداً للناس دايماً
(03:02)
طيب لو اخدنا كمثال الأيفون 11 أو 12 أيا كان أحدث موديل بنلاقي فيه 4 أنواع مثلاً وبنلاقي الفرق ما بين أقل نوع وأعلى نوع مثلاً 50% في السعر ، يعني النوع الأول مثلاً بـ 100 النوع الأخير اللي هو العالي بـ 150 الـ 50 الأخيرة اللي أنت بتدفعهم بنسبة كبيرة جداً أنت مش هتستخدم الحاجه الموجودة ، بمعنى أنه معمول كاميرا للمحترفين ، معمول صوت للمش عارف إيه.. لكن الأيفون العادي اللي بـ 100 هو بالفعل أداك 95% من مزايا الأيفون الـ 5% الاخيرة اللي انت بتاخدهم أنت ممكن تدفع عليهم 50%
أنا مش مع أنك ديماً تشتري الرخيص أنا مع إنك ديماً تبقى معرّف إن أخر 5% من الأستفادة انت بتدفع عليهم قد إيه زيادة ، لو أنت مقتنع إن الفلوس دي انت بجد محتاج تصرفها في الحتة دي اصرفها معنديش مشكلة بس تبقى عارف وحاسب ومجمع الحاجه دي مكلفاك قد إيه ، إن أخر 5% دي مكلفاك 50% من السعر
واحد تاني ممكن يقولي لأ يا عم انا هجيب الحاجه الاساسية ده هيحققلي 95% من المنفعه وهاخد الـ 5% اللي أنا هوفرهم دول أحطهم في حساب التوفير بتاعي مثلاً أو هروح أجيب بيهم حاجه تانية.. تاني ده أختيارك معنديش مشكلة أنت بتعمل إيه بس لازم تعرّف الحاجات دي في دماغك
الحاجه كمان اللي بشوفها ديماً لو أنت أشتريت الحاجه المادية دي أنت لو خرجت من باب المحل ورجعت لنفس الراجل حاولت تبيعهاله تاني غالباً الحاجه دي نزلت قيمتها 20 - 25% عادي كده من غير ما يحصل اي حاجه النزول في السعر ده بسبب بس إن الحاجه أتحولت من إنها حاجه جديد لحاجه مستعمله ، وفي حاجات تانية لو أصغر شوية مش لازم تليفونات بس حاجات صغيره سعرها صغير هي ممكن ميبقلهاش سعر حد يشتريها تاني فلازم تبقى فاهم الحاجه دي قيمتها في دماغك انت وقيمة السلعة بالنسبالي هي مدى إستفادتك منها مش مدى إستفادة المجتمع أو رآي إن الحاجه دي مهمة اوي انها تبقى عندك.. لأ بجد هتستخدم الحاجه دي ودي القيمة الحقيقية للسلعة
(05:47)
طب لو قارنا الكلام ده بالخبرات ، وتعالوا ناخد السفر كنوع من أنواع الصرف في الناحية الخبرات ، لو جبنا 10 أفراد وقولنالهم سافروا نفس الدولة هتروحوا مثلا إندونسيا أو تركيا أو أمريكا.. أي دولة هتروحوا انتو الـ10 وأرجعوا أحكولي الحاجه الوحيدة المكررة في قصتهم كلهم هيبقى المكان ولكن الناس هترجع بـ10 تجارب مختلفة لأن كل واحد هيقضي وقته بطريقة قريبة لشخصيته ، قريبة للحاجات اللي هو عاوز يعملها ، فيبقى السفر للمتعة كل واحد هيطبق الفكر بتاعه ، والسفر مش لازم يبقى بره ، حتى لو روحنا كلنا خرجنا اتعشينا في مكان معين بليل احنا الـ10 اتعشينا في نفس المكان كل واحد هيطلع بتجربة معينة
يبقى أول اختلاف ما بين الصرف على الخبرات وعلى الإمتلاك المادي هو إن التجربة نفسها بتبقى مختلفة تماماً ، الحاجه التانية وانت بتصرف على الخبرة بتاعتك إفتراضاً قولنا أنك هتسافر لو أنا هسافر من حته لحته بالعربية أو بطيارة ، لو أنا اخترت اسافر بطيارة هتكون أغلى صح ولكن هي هتعلي الجودة بتاعة التجربة بتاعتك ، أنا مسافر في طيارة يعني هروح أسهل ، هوصل في ميعاد أحسن ، مفيش مشقه في الطريق ولا تعب فهتزودلي من جودة التجربة بتاعتي فلازم ابقى حاسب الموضوع ده لأنه حاجه مهمة جداً
الحاجه الجميلة في الزمن ده كمان إني في التجارب دي ممكن أخد صور أو فيديوهات تخلي التجربة دي عايشة معايا سنين طويلة ، أرجع أشوفها تديني أحساس الله السفرية دي كانت كذا كانت كذا دي حاجه جميلة جداً
فالتأثير بتاع الصرف على التجارب بيقعد مدى طويل جداً عن الحاجه المادية لان الحاجه المادية بعد ما تجيلي بفترة قليلة بتعود عليها وبتأقلم عليها وببقى تاني محتاج أجدد وأغير بسبب الدافع التكنولوجي اللي بيغير الدنيا بسرعة جداً
يعني مثلاً واحنا صغيرين في عربية دي يااه من أحسن العربيات أفتكر مثلاً وانا صغير نوع عربية معين موديل مثلاً 2005 أو 2002 لو شوفت العربية دي النهاردة انت مش هتصدق انها زمان كانت رهيبة ليه؟ لأن حالتها مع التقدم التكنولوجي مبقاش ليها معنى ولكن الخبرات هي هي بتفضل عبر الزمن مبتتغيرش
(08:53)
الأبحاث اللي بتصدر مؤخراً بتقول ان في اتجاه عالمي ان الناس ابتدت تقدر موضوع الخبرات دي ومش لازم الخبرات دي تكون سفر ، اسافر بره بقى واصرف واحط صوري فين لأ أنا بتكلم على حاجه لنفسك انت ممكن تتصور وتحط صورك لوحدك او محدش يشوفها من صحابك تاني انا مش بعملها أأثر على المجتمع وأقول إني سافرت لأ أنا بتكلم على حاجه لنفسك
لقينا في البحث ده إن مستوى السعادة اللي بيتصرف على الدولار أو الجنية أو اي عملة في حتة الخبرة مردوده على الناس كسعادة أعلى بكتير جداً جداً من الأستحواذ المادي
لما كمان بتصرف على الخبرات اللي بتكتسبها في كده نوع معين من المفاجئة في الحدث اللي هو إيه أولاً أنا بجهز أني مسافر أو بجهز إني رايح كورس ، أو بجهز إني هشارك مع مجموعة معينة بيحبوا مثلاً رياضة معينة هنعملها كلنا مع بعض بخش في حالة نفسية من التجهيز إني رايح للحاجه دي فبيبقى عندي نوع من السعادة اصلاً قبل ما اروح ، إني مستني الحاجه دي
بعد الحاجه دي انا لما بروح هناك الخيرة دي بيبقى عندي فكرة أو توقع معين وبلاقي حاجه تاني جوه والحاجه دي بتمثلك نوع من أنواع السعادة برده اللي هو المفاجئة.. لكن انت لما بتشتري الإمتلاك المادي ده انت عارف ان ده تليفون أو تيشيرت أو جزمة أو أيا كان بعد شوية مفهوش مفاجئة لكن لما تروح تعمل حاجه انت مش متوقعها
(10:58)
الحاجه التانية في الخبرات انك ممكن تكون علاقات مع الناس يعني روحت مثلاً مكان معين لناس هواة رسم بطريقة معينة بتبتدي تعمل علاقة مع الناس دي ، ممكن تتبادلوا صفحتكم على السوشيال ميديا ، تبدأوا تتكلموا ، تبتدوا يبقى في إهتمام مشترك ممكن يخليكوا ترتبطوا مدى أطول كمان ، فدي الفروقات الرئيسية بين الاتنين
(11:30)
الحاجه الاخيرة إن في معظم الشراء المادي أو الإمتلاك المادي بيجي من إحساسك انك هتفقد خصم معين بيحصل في المحل الفولاني.. إنزل بسرعة في خصم كبيرة في الحته الفلانية يلا بينا نروح ، الناس بتاعتة التسويق بالذات فاهمين اللي انا هقوله ده إن معظم الأماكن والمحلات الكبيرة غالبا مش بتبيع السلع بسعرها الرئيسي يعني هو بيسعر الحاجه بـ 100 هو عارف إنه هيبع متوسط بـ 80 ، لأنه مثلاً هيبيع 10-20% من الحجم بتاعه على 100 اللي هو السعر الكامل ولكن 80% هيتباعوا من 70 – 80 جنية أو دولار ليه؟ عشان هو في العالم الجديد بتاع التسوق الأونلاين أو استراتيجيات التسويق ديماً هيحسسك إنك لو مشترتش النهاردة هتخسر كتير انك مش هتوفر التوفير ده فأنت اصلاً ممكن متكونش محتاج الحاجه دي ونازل بس عشان المحل ده عامل تخفيض وانت عارف انك بتحب المحل ده ونزلت اشتريت حاجات كتيرة جداً بسبب انه عامل تخفيض ولكن مش بسبب انك محتاج الحاجه دي
لو عندك أفكار في الحتة دي أو حاجات بتحصلك ياريت تشاركونا برده تجاربكم وآرائكم ما بين الحاجتين برده يعني هل انت تفضل لو معاك فلوس تصرفها على خبرات ولا تصرفها على إمتلاك مادي ، تاني انا مش بنصح الناس انها تاخد كل الفلوس المتوفرة تروح تصرفها في تجارب أو إنها تبطل تشتري حاجات أنا بس بقولك الفرق ما بين الأتنين إن في فروق وفروق واضحه ولازم يبقى عندك الحرية في الاختيار أنا عايز أدفع فلوسي فين وليه
شكراً جداً جداً على وقتكم معانا النهاردة وأشوفكم الإسبوع الجاي
Translation of some words and terms:
Experience خبرة / تجارب
Satisfy رضا
Peer pressure ضغط المجتمعي أو ضغط الأقران
Already بالفعل
Basic أساسي
Utility فائدة / جدوى
Research بحث
Expectation توقع
Common Interest إهتمام مشترك
Marketing تسويق
Online Shopping تسوق عبر الإنترنت
Sale تخفيض
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #الامتلاك_المادي #اكتساب_خبرات #إعادة