103. الزكاة 101 (إعادة)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
بما إننا في شهر رمضان حبينا نعمل إعادة لحلقة الزكاة لأن مفهوم الزكاة مفهوم مش سهل ، وخاصة حساب الزكاة في فئات الأصول المختلفة زي الأسهم ، العملات المشفرة أو أي حاجه أنت بتاخدها للاستثمار.. في حلقة النهارده بندردش مع ضيفنا الأستاذ نادر التهامي في تبسيط مفهوم الزكاة
نادر مصري مقيم في كندا ، كان بيشتغل في المجال العقاري ، بسبب الكورونا الشغل وقف فقرر يبدأ في صناعة المحتوى ، المحتوى اللي بيقدمه نادر عبارة عن فيديوهات بالإنجليزي بتناقش الاستثمار من الناحية الإسلامية.. ومهم جداً أننا ننوه إن نادر مش مفتي أو دارس شريعة هو زي أي حد مهتم بمواضيع معينه بيعمل البحث بتاعه وبيحاول يجيب الآراء من وجهة نظر العلماء باسلوب بسيط وسهل
03:35 إحساسك إيه بتجربة البودكاست؟ -
04:50 إيه اللي ألهمك تبدأ المحتوى بتاعك؟ -
07:03 الزكاة بتعمل إيه في المجتمع؟ وهل الزكاة مفهوم عالمي؟ -
08:28 لو أنا معايا فلوس قد إيه ابقى من الناس اللي مطلوب منها الزكاة؟ -
10:27 أمتى بحدد قيمة الزكاة بتاعتي؟ -
12:27 لو عندي صندوق للطوارئ هحسب زكاتي عليه برده؟ -
12:58 لو عندي محفظة استثمارية وعندي أسهم ، بعامل الأسهم ازاي؟ -
14:23 هل ده بيتطبق على حساب التقاعد؟ -
16:32 هل المفروض أدفع زكاة على البيت اللي أنا عايش فيه؟ -
16:57 لو عندي ملكية للإيجار هل بدفع عليها زكاة؟ -
17:32 لو أنا شاري بيت للأولاد أو للزمن هل بدفع عليه زكاة؟ -
19:47 لو أنا مستثمر في مشروع ولكن شريك صامت هل بدفع زكاة على الفلوس دي؟ -
21:13 لو أنا مستثمر في العملات (دهب وفضة) هل بدفع 100%؟ -
21:45 هل بدفع زكاة على العملات المشفرة والبيتكوين؟ -
23:57 هل في جهات معينة المفروض أدفعلها الزكاة دي؟ -
25:25 عندي 40 سنة وأول مرة أسمع ان عليا زكاة هل المفروض أتوتر؟ -
26:58 إيه الفرق بين الزكاة والصدقات؟ -
28:41 هل بتفضل تدفع الزكاة بتاعتك في حاجه معينه؟ -
الاستثمار وفق الشريعة الإسلامية من الحاجات اللي بتكبر وبتزيد في الوطن العربي لو مهتم بالإقتصاد الإسلامي وعندك استفسارات
@Halalstocktok تقدر تتابع نادر وتشوف المحتوى بتاعه وتتواصل معاه على إنستجرام وتيك توك
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:44
المقدمة
اهلاً بيكوا في حلقة جديدة من بودكاست كلام ينور حلقة النهاردة هي حلقة مختلفة شوية لأول مرة أنا بستضيف حد صانع محتوى
Halal Stock Tok أنا لقيت حساب بالصدفة كده على إنستجرام اسمه
وتواصلت مع صاحب الحساب أستاذ نادر ودعيته اننا نعمل بودكاست وهو شاكراً يعني رد عليا على طول وكان الموضوع سهل جداً أننا نتواصل
مفهوم الزكاة هو مفهوم مش سهل ، طريقة حساب الزكاة خاصة لما نخش في فئات الأصول المختلفة زي الأسهم ، العملات المشفرة أو أي حاجه أنت بتاخدها للاستثمار فكنت عايز ألاقي حد يشرحلنا المفهوم ده وعندي اسئلة كتير في دماغي هسألها لأستاذ نادر أنا مبسوط جداً أنه معايا النهاردة أنا طبعاً مفيش سابق معرفه فأتبسطت جداً اني أول ما بعتله هو رد عليا وهنعمل الحلقة دي مع بعض
نادر حالياً مقيم في كندا ، وكان بشتغل في المجال العقاري ومؤخراً في الفترة بتاعة الجائحة هو ابتدى القناة بتاعته الموجودة على تيك توك وإنستجرام وبيتوسع دلوقتي في اليوتيوب
أنا تفاجئت أنه مصري لأن القناة بتاعته كلها بالإنجليزي ولما اتكلمنا في أول لحظة عرفت انه مصري أنا مبسوط جداً جداً اني قابلت نادر وحاسس ان الناس هتستفيد جداً من اللي هنتكلم فيه ولو عندك أي اسئلة ليها علاقة بالإقتصاد الإسلامي بفئات أصول مختلفة ممكن تبعت لنادر على صفحته على إنستجرام أو تتواصل معاه بشكل مباشر
قبل ما ابتدي برده عايز أأكد على حاجتين الحاجه الأولانية إن نادر مش مفتي أو دارس مثلاً شريعة أو حاجه كده لأ هو زيي زي أي حد بيبحث في المواضيع دي وبيحاول يجيب الآراء من وجهة نظر العلماء ، الحاجه التانية إن العربي بتاعه مكسر شوية وهو بيعتزر لكل الناس ممكن تضايق من العربي بس أنا استمتعت جداً جداً بالكلام معاه
03:35
عمر: نادر أنا مبسوط جداً جداً أنك معايا النهاردة أولاً أخبارك إيه واحساسك إيه بالتجربة بتاعة النهاردة؟
نادر: أنا كويس الحمدلله ، انا متفائل خير النهاردة إن شاء الله ، أول مرة أعمل بودكاست كده وانا مبسوط جداً إنك عزمتني نتكلم في مواضيع مهمه جداً
عمر: أنا مبسوط أكتر ، أنا شوفت الأكونت بتاعك على إنستجرام والطريقة اللي بتعمل بيها المحتوى بتاعك هي جميلة جداً المواضيع بتاعتك بالنسبالي لذيذة محدش بيتكلم فيها ، أنا متأكد أنها بتاخد منك وقت وبحث كبير أنك توصل للحاجات دي بس بجد أنا بحب المحتوى بتاعك جداً جداً وطبعاً الناس كلها اللي بتسمعنا ياريت يتابعوا نادر.. ممكن تقولنا يا نادر الإنستجرام أكونت بتاعك أو التيك توك بتاعك؟
@Halalstocktok نادر: على إنستجرام وتيك توك هو
Halal Stock Tok وعلى اليوتيوب أعتقد نفس الحكاية
عمر: أوكيه واحنا كده كده هنحط العناوين دي في الشو نوتس بتاعتنا
04:50
عمر: قبل ما نبتدي في موضوع النهاردة إيه اللي ألهمك إنك تبتدي حاجه زي كده؟
نادر: والله زي ما معظم الناس عملوا تجربة كتيرة في الجائحة أول ما الشغل وقف والدنيا وقفت قعدت أفكر مع نفسي إيه ممكن أعمله أونلاين إني أسيب حاجه كويسة كده لو حصل حاجه أو اني طلعت بس الأخبار كده للجميع إيه اللي ممكن أكون مبسوط بيه بعد السنين اللي قدام ، فأنا فكرت أني اعمل في العقارات بس في حاجات كتيرة كده والناس مش بتحبها ، فأنا فكرت اني ممكن أتكلم على الاستثمار وأتكلم عليه من الناحية الدينية عشان مفيش حد بيتكلم كتير عن الموضوع ده وهو مهم جداً يعني بالنسبة للجالية الإسلامية عمتاً
عمر: أوكيه.. أنا النهاردة تعمدت أتكلم في موضوع كده لما فكرت أتكلم معاك فيه ، من زمان نفسي أتكلم مع أي حد فيه وكنت عايز أتكلم مع حد بطريقتك اللي هو تبسطلي الموضوع ، أفهمه أكتر ، والناس اللي بيسمعونا يفهموه أكتر وهو إن احنا واحنا صغيرين ديماً كنا بنتعلم في أركان الإسلام الـ 5 من واحنا اطفال يعني أول درس في أولى إبتدائي اللي هو الشهادتين ، الصلاة ، الصوم ، الحج وبعدين الزكاة.. أو الزكاة كانت بتيجي نمرة 4 تقريباً مش فاكر الترتيب بس اللي الأربع حاجات التانين سهلين أوي أي حد من اللي بيسمعونا يقدروا يشرحوهم مفهمش أي مشكلة لكن لو جينا على الزكاة أنا بحس إن الناس مش فاهمة المفهوم. أنا عندي اسئلة كتيرة في الزكاة عايز اسألهالك وخاصة زكاة المال طبعاً احنا بنتكلم هنا عن زكاة المال ، فأنا عندي اسئلة كتير وأفكار كتير عايز ابتدي معاك
07:03
عمر: هل المفهوم دي اصلاً عالمي؟ يعني لو حد مش مسلم فكرة الزكاة نفسها بتعمل إيه في المجتمع؟
نادر: فكر فيها زي الضرايب ، في أي بلد بيكون في ضرايب بتدفعها عشان تساعد الجميع بما فيها أن هما يستعملوا الفلوس عشان يبنوا شوارع ، يبنوا مدارس ، يبنوا مستشفيات حاجه تفيد البلد فالفكرة نفسها موجودة اصلاً في أي مكان أنت ممكن تدور فيه ، بس الزكاة بالذات هي ليها أستعمال خاص انك تساعد حد محتاج الفلوس ، مش بس أنك تساعد الجميع أنت ممكن تتبرع بيه عشان تساعد واحد في أزمه مش عارف يلاقي أكل ولا شرب ، عنده ديون تفك ديون الشخص ده وكل ما يكون الحد ده أقربلك يكون أحسنلك في الأخر
عمر: تمام يعني هو مفهوم عالمي من أساسه نقدر نشوفه في أمثلة كتير ، أنا بس مش عايز الحلقة دي تكون موجهة لحد يعني أنا عايز المسلمين طبعاً يستفيدوا جداً من الحلقة دي أكيد بس عايز الناس تفهم البُعد ورا الموضوع أكتر..
08:28
عمر: أول سؤال ليا ازاي أقدر قيمة الأصول بتاعتي؟ وإيه الجزء اللي مفروض أدفع عليه زكاة؟ إيه النسبة لو أنا معايا فلوس قد إيه ابقى من الناس اللي مطلوب منها الزكاة؟
نادر: في نطاق كده في النسبة ، لو أنت عندك فلوسك في الإطار ده أقل حاجه تكون قاعدة معاك في الحسابات سنة يعتبر عليك زكاة
لو بصيت عليها من ناحية الفضة هو 21 أونص أو 613 جرام فضة اللي هو تقريباً 503 دولار أمريكي السنة اللي فاتت ، فده أقل حاجه تكون قاعدة في الحساب عندك لمدة سنة تدفع عليها زكاة والناحية الأكبر اللي هو الدهب النسبة تعتبر 88 جرام اللي هو حوالي 4800 دولار أمريكي.
الأسعار دي على حسب أسعار الدهب والفضة بس الأسعار دي من السنة اللي فاتت من مارس 2021 فلو واحد عايز يشوف الأسعار الموجودة دلوقتي عشان يحسب النسبة كام هو ده النطاق اللي أنت مفروض تكون فيه اللي يعتبر عليك زكاة
09:58
عمر: دي كلمة مهمه على الفلوس اللي قعدت في الحساب عندي في البنك لمدة سنة ومتحركتش مظبوط كده؟
نادر: فلوس وأصول ، أي حاجه أنت تكون مشغلها مش بس كاش ، أي حاجه تعتبر أنك محوشها غير اللي أنت بتستعمله هو ده اللي يتقدر قيمته عشان تعرف لو عليك زكاة أو لأ
10:27
عمر: طيب تعالى نمشي كده في الحسابات واحده واحده ، أنا عندي حساب بقبض فيه مرتبي ازاي باخد اللقطة بتاعتي يعني أمتى بسعر؟ هل بيبقى يوم 1 في السنة هل يوم أنا بختاره ازاي؟
نادر: أنت مع نفسك لازم تختار مره في السنة وأحسن لو كان اليوم ده في التقويم الهجري فأنا بشوف أول رمضان أول ما يجي هو ده الوقت اللي بعمل إيقاف مؤقت لكل الحسابات بتاعتي عشان أشوف إيه الموجود في كل الحسابات عشان أحسب الزكاة فأنت بتختار يوم وبعدين تبتدي مع كل الحسابات اللي عندك وتكتبها عشان تعرف توصل للمبلغ الكامل اللي عليه الزكاة
عمر: حلو يعني أنا بصيت لقيت في حساب البنك بتاعي أكتر من 500 دولار أو الرقم اللي هبتدي بيه النسبة بتاعتي ببص يوم 1 رمضان هقول أنا عندي الرقم ده هبتدي أحسب زكاتي على الرقم ده في حسابي النقدي.. النسبة قيمتها بتبقى قد إيه؟
نادر: الكاش كامل لازم تاخد عليه 2.5%
عمر: يعني أي رقم عندي في البنك يوم 1 رمضان باخد عليه 2.5% مظبوط؟
نادر: يعني هو بيقولك إن الفلوس دي المفروض انها يعدي عليها سنة ، لكن أنا بالنسبالي لو أنت بتدفع الزكاة كل سنة لو أنت بتعمله في نفس اليوم تاخد بس الأرقام دي عشان تسهل عليك يعني مش عايزك تخش في انت قبضت أمتى ، والفلوس قعدت قد إيه ، طب أنت صرفت منها ولا لأ يعني أنت عايز تسهلها عليك وفي نفس الوقت نيتك تبقى سليمة مع ربنا فهو أحسن حاجه لو عملتها سنة ورا سنة في نفس اليوم عشان بس تسهل على نفسك الحسبة في الأخر
12:27
عمر: طيب لو أنا عندي صندوق طوارئ ، احنا بنقول للناس إن المفروض يبقى عندك 3 شهور لـ 6 شهور أنت شايلهم على جنب مبتلمسهمش مبتتحركش فيهم ، فدول طبعاً يعدي عليهم السنة هما موجودين قاعدين بيعدوا.. ففي صندوق الطوارئ أنا برده هحسب نسبة زكاتي عليهم صح؟ يعني هاجي يوم 1 رمضان مثلاً أشوف عندي كذا أخد منهم 2.5% مظبوط؟
نادر: آه مظبوط
12:58
عمر: طيب لو أنا عندي محفظة استثمارية وعندي أسهم ، بعامل الأسهم ازاي؟
نادر: بص كان في فتوى طلعت من سنتين كده هما عملوا تقرير كده عشان يشوفوا الشركات اللي في لندن وبعد ما عملوا البحث بتاعهم لقوا إن مفيش أكتر من 25% من الأسهم نفسها إدفع عليه زكاة فأي استثمارات شغالة في شركات غير صندوق المؤشرات المتداول في الدهب والعملات المشفرة ده تاخد 25% من القيمة في اليوم اللي بتاخد فيه اللقطة بتاعتك هنقول 1 رمضان تشوف القيمة السوقية كام وتاخد 25% منه يتحسب عليه الزكاة
عمر: حلو يعني أنا هخش على حساب السمسرة بتاعي هشوف قيمة محفظتي يوميها وهاخد منه 25% يعني مثلاً عندي 10000$ هاخد منهم 2500 هو ده اللي هدفع عليه زكاة مظبوط؟ وهدفع عليه برده الـ 2.5% يعني 2.5 من الـ 25% مظبوط كده؟
نادر: صح
14:23
عمر: هل ده بيتطبق برده على حساب التقاعد بتاعك؟
401k يعني مثلاً في خطة التقاعد في أمريكا
IRA - Roth IRA في مسميات كتيرة لحسابات زي
أياً كان اسمه إيه ، هل أنا باخد 2.5%حساب التقاعد بتاعي بدفع عليهم برده زكاة ولا دي فلوس بتقعد مدة طويلة؟ عايز أفهم الحتة دي برده
نادر: لازم تخش تشوف إيه اللي جوه الحسابات دي ، يعني لو هي أسهم في شركات تاخد الـ 25% مفيش أي مشكلة بس لو في نسبة فيها في صندوق 401k مؤشرات الدهب ، معادن قيمة زي ما قولتلك أو أي أصول ثابتة بيكون في حاجات من ناحية الـ
في كندا لو هما عن طريق شركات شغالين فيها ممكن يكون في حرمانيه في الموضوع فالفلوس دي اللي قاعدة في حاجات مش حلال أصلاً دي RSPs
برده تعتبر كاش تحاسبها على الزكاة معظم الوقت الفلوس دي تعتبر زي الدخل بتاعك الرسمي فلازم تدفع عليها زكاة لو هي قاعدة في الحساب فأول ما تتأكد إيه في الأسهم وإيه في صناديق المؤشرات وإيه في الأصول الثابتة هو ده اللي هيحددلك إيه اللي ممكن تدفع عليه زكاة ، الأسهم في الشركات دي 25% اللي تاخد منها 2.5% ، أي حاجه غير الأسهم زي الأصول الثابتة أو صناديق الاستثمار المتداولة للمعادن الثمينة دي هتتحسب الـ 100% هتاخد منه %2.5
عمر: خلينا نفترض إن المحفظة هنا كلها متوافقه مع أحكام الشريعة الإسلامية ، انا عندي استثمارات مثلاً أسهم متوافقة مع الشريعة الإسلامية فهدفع عليها بالطريقة اللي أنت قولت عليها تمام كده؟
نادر: أكيد
16:32
عمر: طيب لو روحت بعد كده للعقارات ، لو أنا أمتلك البيت اللي أنا عايش فيه هل المفروض أدفع عليه زكاة؟ قيمته النهاردة مثلاً مليون جنية أو دولار هل أنا مفروض أدفع زكاة على المليون دولار دي؟
نادر: لأ عشان البيت يعتبر ملك شخصي ، والملك الشخصي ده ميدفعش عليه زكاة طول ما أنت بتستعمله بره الاستثمار
16:57
عمر: طيب لو روحنا لبيت تاني ، أنا عندي فلوس وأشتريت بيها شقة صغيرة مأجرها يعني عندي ملكية للإيجار بدفع عليها زكاة؟
نادر: آه في اللحظة دي آه هتدفع عليها زكاة عشان تعتبر انك بتستعملها في شغلك فده يعتبر المخزون بتاعك فالدخل بتاعه عن طريق الإيجار وعن طريق قيمة البيت بيدفع عليها زكاة
عمر: فأنا بقيمها وبدفع عليها 2.5% من قيمتها السنوية مظبوط كده
نادر: 100 100
17:32
عمر: طيب لو أنا مش مأجر ، عندي بيت شاريه للأولاد أو شاريه للزمن هل بدفع عليه زكاة ولا لأ؟
نادر: بس في إختلاف في الموضوع في بعض يقولك آه ، وبعض يقولك لأ ، بس فكر فيها زي الدهب اللي انت بتشتريه تديه لمراتك تبع المهر وكده ده مبيدفعش عليه زكاة عشان هي هتلبسه وكده ، بس هو يعتبر بيت بس مش سهل تعمله تصفيه يعني فعشان كده بيقولك لو هو مش متأجر ميدفعش عليه زكاة بس أنا بفضل أكون في الأمان يعني أنه لو أنت شاريه اصلاً للاستثمار فلازم يدفع عليه زكاة ، بس لو أنت شاريه زي شاليه في مارينا أو حاجه زي كده وأنت هتستعمله مش هتأجره ده ميدفعش عليه زكاة
عمر: تمام واضح ، لأن أنا برده السؤال ده ديماً يجيلي والناس بتسأل عليه اللي هو طب أنا البيت مبيطلعليش أي دخل ومعيش سيولة أدفع
نادر: بص لازم تفكر فيها إن نيتك إيه يعني من الاخر كده أنت نيتك هتكون بينك أنت وربنا فأنت لو ناوي إن البيت ده استثمار فهو واضح ازاي تحسبها من ناحية الزكاة بس لو انت شاريه كبيت تاني لاولادك او للمستقبل ليك أو للتقاعد مفيش أي مشكلة ده يعتبر من ملكك اللي هتستعمله معلهوش زكاة
عمر: فاهم قصدك لأن أنا فعلاً ممكن أشتري بيت للاستثمار وبعد ما يطلع بعد 10 سنين وأبيعه أنا هعمل أرباح مالية كبيرة ومش هكون دفعت عليها أي حاجه فالأفضل ان كل سنة أطلع عليه جزء لو هو بنية الاستثمار.. دي حاجه واضحة جداً
19:47
عمر: طيب واحد صاحبي فتح مشروع وقالي أديني يا عمر 10000 دولار استثمرهم معايا في المشروع ده والفلوس دي واقفه عنده بقالها مثلاً 5 سنين أنا مفروض في الـ 5 سنين دي أدفع زكاة على الفلوس دي ولا لأ؟ وأنا مش بشتغل في المشروع ده خالص أنا مستثمر فقط
نادر: بص لو أنت حاطط فلوس أنك تكون شريك بأي نسبة لازم تحسب الدخل بتاع المشروع كام والديون عليها إيه عشان تشوف إيه اللي يدفع عليه زكاة فطالما انت ممكن في أي وقت تقوله أنا عايزك ترجعلي حقي في المشروع أنتم وقتها هتشوفوه يساوي كام عشان يرجعلك حقك بالفلوس اللي أنت اشتريتها سعر الـ 10000 في الوقت اللي أنت هتحسب فيه الزكاة لازم تشوف النسبة كام وبعدين تحسبها عشان تاخد منها الـ 2.5% بس لازم تشوف صافي المبلغ كام ، لأن قيمة المشروع غير الجزء اللي بيدفع عليه الزكاة عشان لو في ديون أو في حاجه محتاجه تدفع ده ميتحسبش عليه زكاة بس لو في أسهم أو أصول كل ده بيضاف عليه زكاة
عمر: أوكيه يعني حتى لو أنا شريك صامت المفروض أجيب تقييم للشركة نفسها أشوف الـ 10000 بتاعتي بقت كام دلوقتي وأدفع عليها مظبوط كده؟
نادر: أيوة صح
21:13
عمر: بالنسبة لصناديق الاستثمار احنا غطناها لو هي صناديق استثمار أسهم هندفع عليها 25% زيها زي الأسهم ، طيب لو دهب بقى لو أنا مستثمر في الدهب أو صناديق المؤشرات في الدهب أو الفضة اللي هي العملات هل بدفع 100%؟
نادر: آه 100% أنت بتاخد قيمتها اليوم اللي أنت بتحسب فيه الزكاة وهو 100% من سعرها هو ده اللي أنت هتدفع عليه الزكاة
21:45
عمر: ولو عندي محفظة من الأصول الرقمية زي العملات المشفرة ، البيتكوين ، الأثريوم ، (إن اف تي) أي حاجه هل أنا بدفع زكاة على قيمة المحفظة بتاعتي في نفس اليوم ده؟
نادر: آه الأصول الرقمية بتتعامل معاملة الكاش ماعدا الـ (إن اف تي) فيها أختلاف لأن هي يا أما زي الدهب اللي بيتلبس وكده او انها تكون استثمار فهو على حسب نية الشخص اللي بيشتريها علشان ساعات (إن اف تي) بيبقى عبارة عن تويته (تغريدة) ، موسيقى ، صورة ، فأنت لو عندك صور في البيت مش هتدفع عليها زكاة بس لو أنت شاريها اصلاً عشان تستثمر فيها ده يعتبر تبع الحسبة عشان تدفع عليها زكاة
عمر:عمري ما أخد بالي من الحته دي عمرك ما هتدفع زكاة على صور ولادك اللي أنت طابعهم في البيت هو نفس الفكرة يعني ، عمري ما فكرت فيها لأن بعض الـ (إن أف تي) في مرحلة ما هيكون عندهم نوع من الاستخدام كشخص
نادر: آه أكيد
23:03
عمر: في أي فئات أصول تانية احنا متكلمناش عليها تفتكر أنها يكون فيها زكاة مثلاً؟
نادر: أعتقد اننا غطينا تقريباً كل حاجه يعني الحاجه الوحيدة اللي هو لو أنت عندك مشروع بتاعك غير الجزء بتاع الشريك الصامت يعني أنت عندك محل ، عندك مطعم لازم تاخد في اليوم ده المخزون بتاعك كامل عشان يخش جوه الحسبه ، يعني تدخل المخزون وبعدين تشيل منه الديون اللي عليك هو ده اللي أنت هتحسب عليه 2.5% عشان الزكاة
عمر: المخزون ده اللي هو الحاجات اللي مفروض أبيعها صح؟
نادر: مظبوط
23:57
عمر: أنا المفروض أدفع الزكاة دي لمين؟ هل في جهات معينة يعني أنا قعدت عملت الجدول آخر السنة حسبت الأرقام بتاعتي وطلعت 2.5% أروح أودي الفلوس دي فين؟
نادر: طبعاً أنت لازم تشوف القرآن بيقول إيه الأول ، فبيقولك ذو القربى واليتامى والمساكين وأبن السبيل فأنت لو عندك حد من أهلك تعرف أنهم محتاجين الفلوس دي أنت شوف مين محتاج إيه وقد إيه وامتى وازاي دي تعتبر من الحاجات المفضله اللي ممكن تعملها تساعد أهلك الأول وبعد كده بقى شوف المساكين يعني تروح دار الأيتام ، تروح أي مكان بيعملوا فيه بير الماية يعني في حاجات كتيرة ممكن تتعمل تعتبر زكاة ، لو في حد عنده ديون محتاج يدفع حاجه ومعندهوش فلوس ممكن تساعده انه يفك الديون يعني في خيرات كتيرة ممكن انك تتبرع فيها بس الأفضل انك تبتدي في الدايرة بتاعتك وبعدين أطلع شوية شوية لحد ما متلقيش حد ، ممكن تلاقي شركات زي منظمة الإغاثة الإسلامية ، و منظمة هيومان كونسيرتيشن إنترناشيونال أي حاجه بتساعد المسلمين عمتاً ولو المسلمين مش محتاجين مساعدة بقى ممكن تدور على أي حد محتاج الفلوس محتاج أي مساعدة
25:25
عمر: طيب لو أنا نسيت أدفع ، أو أول مرة في حياتي أسمع عن موضوع الزكاة انا عندي 40 سنة دلوقتي وأول مرة أسمع اني عليا زكاة هل المفروض أتوتر؟
نادر: على حسب المشكلة أنت متعرفش وربنا بيسامح وكده دي متعتبرش حاجه منهم اللي هي الزكاة فهي الكفارة بتاعتها أنك تدفعها فلازم تشوف من أمتى الزكاة كانت فرض عليك وبعدين تحسب بالتقريب يعني الإجمالي كل سنة كام علشان تحسب عليها الـ 2.5% عشان تكون كفرت انك مدفعتش زكاة لحد دلوقتي
عمر: ودي ممكن تكون بالتقريب صح؟
نادر: بص أنت عندك كل حاجه تقريباً الأيام دي ديجيتال وعندك إماكنية الوصول غير المحدود فممكن ترجع ورا عشان تشوف إيه اللي كان عليك يعني انت ممكن تخش في حسابك اللي في البنك وكمان أنت هتكون عارف يعني أنا في الوقت الفلاني من السنة انا كان عندي كام في الحساب أو كان عندي كام في الاستثمار أو كان عندي قد إيه دهب أو عندي قد إيه حاجات ممكن تتحسب عليها الزكاة وبتعمل كده بالتقريب وخلي نيتك سليمة مع ربنا وتوب بعد كده
عمر: وبعد كده كمل وأدفعها عادي وهتبقى عادة سنوياً فمش هتحس فيها مشكلة
نادر: أكيد
26:58
عمر: طيب أنا النهاردة عايز أعرف برده عشان الناس كتير مبتبقاش مفرقه إيه الفرق بين الزكاة والصدقات؟ يعني الناس ديماً تقولك أنا بعمل خير كتير ، شوفت حد فالشارع أديتله حاجه ، هل دي بتختلف عن الزكاة الأساسية؟
نادر: أكيد طبعاً الزكاة هو الفرض زي ما بتروح تصلي الخمس صلوات بتاعتك هو ده الفرض ولو أنت صليت النوافل بعد كده السنه أو اي حاجه دي تعتبر الخيرات الزيادة فلما أنت بتدفع الزكاة غير لما بتطلع صدقه في أي وقت بس هو الفرق ما بينهم أن لو في نيتك إن ده يعتبر من الزكاة بتاعتك اللي هتطلع ممكن تعملها كده يعني انت ممكن تطلع الزكاة قبل اليوم اللي أنت بتطلع فيه الزكاة أو لو كنت حاسبها من السنة اللي فاتت وتقول لنفسك أن انا عندي شهر او شهرين أو 3 شهور عشان أدفع الزكاة بتاعتي بالكامل فممكن يعني لو لقيت حد في الشارع وطلعت عليه ده يعتبر من الزكاة بتاعك
عمر: بس المفهوم نفسه لازم يكون محسوب صح؟ زي الضرايب كده ، بتروح تطلع ورقة وتقدمها لمصلحة الضرايب ، فأنت بتعمل نفس الحاجه مع ربنا اللي هو بتطلع ورقة وبتقدمها إن دي الحسابات بتاعتك
نادر: أكيد طبعاً
28:41
عمر: هل أنت كنادر عندك نوع مفضل أو حاجه عليها عائد عالي أوي في الزكاة وانت بتطلها؟
نادر: أنت لازم تشوف ربنا قالك إيه عشان هو ربنا لما بيعمل حاجه فرض علينا وبيقولك الشروط بتاعها عشان هي دي الحاجات اللي هو بيحبها فهو لما يقولك عايزك تصلي وتقوم الفجر وتتوضى هو عملها كده وخلاها فرض عشان هو بيحب الحاجه دي ، فهو لما يقولك الزكاة فرض وأول حاجه من الزكاة دي ذى القربى فلازم أنت تدور على أي حد في عيلتك فعلاً محتاج الفلوس دي وأكيد عشان احنا مصريين أكيد هتلاقي حد في العيلة محتاج الفلوس دي فأنا بفضل أدور في عيلتي وماشاء الله عيلتي كبيرة في مصر فأي واحد بيكون محتاج أنا ببعتله وهما لو مش محتاجين الفلوس هما هيعرفوا حد هيكون محتاج وده اللي أنا بحب أعمله قبل ما ادور على حاجات تانية
عمر: على فكرة أنا مش قصدي أقولك العائد على الاستثمار بالمفهوم الرأسمالي
نادر: لأ بس ده مفهوم رائع انه إيه اللي هيحققلك أكبر عائد! يعني لما ربنا يقولك حاجه بالحرف كده هو ده اللي هيطلعلك أكتر حاجه حتى لو قولت اننا ناوي اروح أصلي في المسجد الصبح ومروحتش هي النية دي هتديلك الثواب حتى لو أنت روحت أو ماروحتش فأنت لازم تفكر في الموضوع ده كده ده اعلى عائد مع ربنا عشان هو اللي بيجزي بيه ، الزكاة كلها عبارة عن إيه اننا بناخد حسنات فلما أنت بتعملها في رمضان فكل حاجه تضربها في 70 يعني الحسنة خلال السنة عاديه في رمضان أضربها في 70 أو الـ 10 بتوع ذو الحجة ، يعني هتحاول تشوف إيه الأوقات اللي ممكن تستغلها لو بتخزن الحسنات عندك قبل ما نتحاسب كلنا
عمر: بالظبط وكمان أظن ان الأقربون محطوطه برده عشان تزود الرابط اللي في المجتمع أو تقرب العائلات من بعضها بشكل غير مباشر ، يعني الزكاة هي نوع من إعادة توزيع للثروة صح؟ يعني أنت بتنقل من اللي معاه للي معهوش.. أقصد إن مفهوم الزكاة ليه معنى كبير جداً
31:51
عمر: في أي حاجه تانية أنت حاسس أننا مغطنهاش في موضوع الزكاة؟ أنا عارف إنك عندك فيديو قصير على قناتك كنا ممكن نخلص كل ده في 30 ثانية ودي فكرة القناة بتاعتك والمحتوى بتاعك بس في أي حاجه احنا مذكرنهاش في موضوع الزكاة أو شايف ان في حاجه المفروض نتلكم فيها؟
نادر: بص أنت ممكن تفتح مواضيع كتيرة من ناحية الزكاة عشان في شروط كتيرة وفي كلكعه في الموضوع ساعات وظروف الناس ساعات مختلفة بس أكتر حاجه لو أنت مش فاهم إيه اللي محتاج تعمله بالظبط أو لو عندك حاجه غير اللي احنا مغطنهاش عشان تقريباً احنا تقريباً غطينا أغلب الحالات روح دور على إمام جامع أو اي حد تعرفه في الدين في المكان اللي انت فيه واسأله عشان يساعدك ، وبرده في كذا حاسبة زكاة أونلاين بتبقى سهلة جداً الأيام دي بس أنت لازم تكون عارف إيه اللي هدخله عشان تعملك الحسبه
عمر: وممكن أبعتلك على الحساب بتاعك برده؟ يعني لو عندي سؤال ممكن أبعتلك تجاوبني برده؟ أنا بعتبرك من مصادري يعني بصراحة
نادر: وانا لو مش عارف هسأل يعني أنا مش بفتي فتاوي أنا مش قد المسؤولية
عمر: وهو ده الهدف يعني أعتبر نفسي صديقك فاحنا اتنين صحاب قاعدين بيتكلموا في القصة بتاعة الزكاة من وجهة نظر بسيطة من غير كلكعه وبعدين أنت ممكن تحسبها أعلى شوية من العادي عشان تبقى في الأمان مش لازم تحسبها بالملي التسهيل أنا كل قصتي أنك بتسهل على نفسك موضوع الزكاة وبنحاول نفهمه مع بعض..
34:00
عمر: أنا عموماً مبسوط جداً جداً من التجربة دي وعايز الناس اللي عنده أهتمام أكتر بالإقتصاد الإسلامي أو الاستثمار وفق الشريعة الإسلامية لأن ده يعتبر من الحاجات اللي بتكبر في الوطن العربي وبشوفها بتزيد فيقدر يتابعك ويشوف المحتوى بتاعك ويبعتلك اسئلته ، وانا عارف إن الفيديوهات بتاعتك كلها إنجلش فأنا اسف اني ضغط اننا نعمل الحلقة دي بالعربي
نادر: لأ أنا اللي اسف لو أي حد إنزعج بالعربي بتاعي هو مكسر بس أنا زقيت معاكو النهاردة زي فيلم يوم ملهوش لازمه زوق معايا اليوم
عمر: والله يا نادر أنا مبسوط جداً جداً اني اتعرفت عليك ومبسوط انك معايا النهاردة وأعتقد هنبقى مع بعض تاني إن شاء الله لو وقتك يسمح وتيجي معانا مره تانية هبقى سعيد اني أبقى معاك في المحتوى وأحاول اساعدك بأي شكل من الأشكال.. بشكرك شكراً جزيلاً على الحلقة بتاعة النهاردة وهنحط في الشو نوتس الحاجات اللي احنا ذكرناها ، وازاي نحسب الحاجات اللي أنت قولتها في الحلقة وأشكرك جداً على وقتك معانا يا نادر
نادر: الله يخليك يا عمر
Translation of some words and terms:
Content Creatorصانع محتوى
Concept فكرة/مفهوم
Cryptocurrency عملة مشفرة
Pandemic جائحة
Channel قناة
Expand وسع
inspired you ألهمك
News أخبار
Real estate العقارات
Investing الاستثمار
Universal عالمي
Value قيمة
Assets الأصول
Cut off قطع
Range نطاق / إطار
Screenshot لقطة
Calendar التقويم
Pause إيقاف مؤقت
Calculation حساب
Cash account حساب نقدي
Emergency Fund صندوق طوارئ
Report تقرير
Stocks أسهم
ETFs: Exchange Traded Fund صندوق المؤشرات المتداولة
Snapshot لقطة
market value القيمة السوقية
Brokerage السمسرة
Portfolio محفظة
Retirement Account حساب التقاعد
IRA (Individual Retirement Account) حساب التقاعد الفردي
Equities أسهم
Precious Metals معادن قيمة
Fixed Assets أصول ثاتبة
RSPs (Registered Retirement Savings Plan) خطة ادخار التقاعد المسجلة
Assumption إفتراض
Shariah Compliant متوافق مع أحكام الشريعة الإسلامية
Real Estate العقارات
Property for rental عقارات للإيجار
Inventory المخزون
Liquidation تصفية
Safe Side في أمان
Clear واضح
Income دخل
Liquidity سيولة
Down the Line في المستقبل
Capital Gains أرباح مالية
Investor مستثمر
Net amount صافي المبلغ
Silent Partner شريك صامت
Digital Assetsالأصول الرقمية
NFts (non-fungible tokens) الرموز غير القابلة للاستبدال
Treat يعامل
Except ماعدا
Position وضع
Interesting مثير للاهتمام
The same kind of concept نفس الفكرة
Usage إستعمال
Business عمل
Spreadsheet جدول
Islamic Relief منظمة الإغاثة الإسلامية
Human Concern International منظمة هيومان كونسيرتيشن إنترناشيونال هي منظمة خيرية كندية غير حكومية مسجلة فيدراليا تعمل في مجال التنمية الدولية ومساعدة الإغاثة في حالات الطوارئ منذ عام 1980
Panic فزع / هلع
Digital رقمي
Unlimited Access وصول غير محدود
going forward مضي قدماً
Taxes ضرائب
IRS (Internal Revenue Service) مصلحة الضرائب
Filing الايداع
ROI (Return on Investment) العائد على الاستثمار
Capitalist رأسمالي
inequality عدم المساواة
Wealth Redistribution إعادة توزيع الثروة
Most of Scenario معظم الحالات
Local Mosque Imam إمام مسجد محلي
Zakat Calculator حاسبة الزكاة
I consider you one of my sources أنا بعتبرك أحد مصادري
Conservative حذر
Offended إنزعج
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #الزكاة